މަހަލްދީބް ފައުންޑޭޝަން އިން ދެކޭ ގޮތުގައި ތައުލީމީ ނިޒާމު ބިނާ ވާންވާނީ އިސްލާމްދީނާއި، ސައިންސާއި، އަދި ޒަމާނީ ދިރިއުޅުމަށް ބޭނުންވާ ޕްރެކްޓިކަލް ހުނަރުތަކުގެ މައްޗަށެވެ. ތައުލީމު އުނގެނުމުގެ އެންމެހާ މަރުހާލާއެއްގައިވެސް މި އުސްލޫބުތައް ހިފަހަށްޓަންޖެހޭނެކަމަށް އަޅުގަނޑުމެން ގަބޫލް ކުރަމެވެ. އެގޮތުން، މި ތަސައްވުރު އަސްލަކަށް ހެދުމަށްޓަކައި، އަލުގަނޑުމެންވަނީ ‘މަހަލް ލަރނަރސް ޕްރީ ސްކޫލް’ ގެ ނަމުގައި، މާޅޮސްމަޑުލު އުތުރުބުރި ދުވާފަރުގައި، 2020 ވަނަ އަހަރުގެ ޖަނަވަރީ މަހުންފެށިގެން، ޕްރީ ސްކޫލެއް ހިންގަން ފަށާފައެވެ. މި ސްކޫލަކީ 2004 ވަނަ އަހަރުގެ ސުނާމީގެ ކާރިޘާއަށް ފަހު ސޭފް އައިލެންޑެއްގެ ގޮތުގައި ބިނާކުރެވުނު ދުވާފަރުގައި ބައިނަލްއަޤްވާމީ ރެޑްކްރޮސް އަދި ރެޑްކްރެސެންޓް ޖަމާޢަތުން ބިނާކުރި 500 ކުދިންގެ ޖާގައިގެ ޕްރީސްކޫލެކެވެ.

ރެއިޒް އަކީ ދަރިން ތަރުބިއްޔަތުކުރުމުގައި ގެންގުޅެވިދާނެ ޒަމާނީ އަދި އިސްލާމީ ވިސްނުމާއި، އުސޫލުތަކާއި އުކުޅުތަކާމެދު ބެލެނިވެރިން ހޭލުންތެރިކުރުވުމަށް ހިންގޭ ޕްރޮގްރާމެކެވެ. މި ޕްރޮގްރާމްގެ ދަށުން ތައްޔާރުކޮށްފައިވާ ލެކްޗަރ ސީރީޒްއާއި ވަރކްޝޮޕްގެ 100 އަށްވުރެ ގިނަ ސެޝަން މިހާތަނަށް ކުރިއަށް ގެންދެވިފައިވެއެވެ. އަދި ކުރިއަށް އޮތްތާނގައި މިކަމާ ގުޅުންހުރި އޮންލައިން ކޯހަކާއި، މި މަޢުޟޫގައި ފޮތް ޝާޢިޢު ކުރުމަށް އަޅުގަނޑުމެން ގަސްތުކުރަމެވެ.

ޕްލެޓްފޯމް ފޯ އިންޖެނުއިޓީ އެންޑް އެންލައިޓެންމެންޓް  (ޕައި) އަކީ މަހަލްދީބް ފައުންޑޭޝަންގެ ފަރާތުން  ދިވެހިރާއްޖޭގެ ޒުވާނުންގެ ހުނަރުތަކާއި މޮޅު ހިޔާލުތަކާއި ތަފާތު ތަޖުރިބާތައް މުޖުތަމައަށް ހުށަހަޅައިދިނުމަށް ތައާރަފްކޮށްފައިވާ ޕްލެޓްފޯމެކެވެ. ޕައި އިން އަމާޒުކުރަނީ ދިވެހި ޒުވާނުންގެ ހުނަރުތައް، މުޖުތަމައުގެ ބިނާކުރަނިވި ފާޑުކިޔުމުގެ ޒަރިއްޔާއިން އިތުރަށް ފުރިހަމަ ވެގެންދިޔުމަށާއި، އަދި ޒުވާޏުންގެ އުފެއްދުންތެރި ހިޔާލުތަކަށް މުޖުތަމައުގެ މަޤުބޫލުކަން  ހޯދައިދިނުމުން  ޒުވާނުންގެ މެދުގައި ތަފާތު މޮޅެތި ހިޔާލުތައް އުފެއްދުމަށް ހިތްވަރު އާލާކުރުމަށެވެ. މިހާތަނަށް ޕައި އިން ވަނީ ޑިސެމްބަރު 2017 އިން ފެށިގެން ސިލްސިލާކޮށް ތަފާތު އެކި ފަންނުގެ ޒުވާނުންނަށް ހިޔާލުތަކާއި ތަޖުރިބާތައް މުޖުތަމައަށް ހުށައަޅައިދިނުމަށް މަގުފަހިކޮށްދީފައެވެ.

ކޮންމެ މުޖްތަމަޢެއްގެވެސް ކުރިމަަގަކީ އެ މުޖްތަމަޢުގެ ތުއްތު ކުދިންނެވެ. ދުޅަހެޔޮ، ހިތްހެޔޮ، އޯގާތެރި، އަމާނާތްތެރި، ތަޤްވާވެރި މުޖްތަމަޢެއް ބިނާކުރުމަށް ބޭނުންވާނަމަ އެންމެ ބޮޑު ސަމާލުކަމެއް ދޭންޖެހޭނީ އެމުޖްތަމަޢެއްގެ ތުއްތު ކުދިން ހެޔޮގޮތުގައި ތަރުބިއްޔަރު ކުރުމަށެވެ. އެގޮތުން މި ޕްރޮޖެކްޓް ޚާއްސަ ކުރެވިފައިވަނީ އެކުދިންނަށެވެ. މި ޕްރޮޖެކްޓްގެ ދަށުން ތުއްތުކުދިންނަށް ތަޢުލީމް ދިނުމުގައި ބޭނުންކުރެވޭނެ ފޮތާއި އެކި ޓީޗިންގ އެއިޑް ތައްޔާރުކުރެވޭނެއެވެ. އަދި ވަކި އުމުރުފުރައެއްގެ ކުދިންނަށް ޚާއްސަ ވަރކްޝޮޕާއި ސެޝަން ހިންގޭނެއެވެ.